Reglugerð um limaskap og skifti av svimjifelag

Reglugerð um limaskap og skifti av svimjifelag

Svimjari hevur rætt til at vera limur í fleiri svimjifeløgum í senn, men kann bara umboða eitt felag í svimjikappingum í senn.

Luttøka uttanlands fyri útlendskt svimjifelag, broytir ikki uppá rættindi at umboða eitt svimjifelag í Føroyum.

Skifti av felag

A.    Ynskir svimjari at umboða annað felag innan svimjing, er skifti galdandi 30 dagar eftir at Svimjisamband Føroya hevur móttikið skrivliga fráboðan. Fráboðanin skal sendast við telduposti til skrivstovuna hjá Svimjisambandinum. Í fráboðanini skal standa fulla navnið á svimjaranum, føðingardagur og navnið á gamla felagnum. Hesar 30 dagarnar umboðar svimjarin gamla felagið í kappingum og úttøkum.

B.    Í sama kappingarári kann svimjari í mesta lagi skifta felag tvær (2) ferðir og í mesta lagi umboða tvey (2) feløg.

C.    Svimjari, ið ikki hevur luttikið í svimjikappingum í Føroyum seinastu 2 kappingarárini, kann uttan fráboðan umboða annað felag. Hetta verður ikki roknað sum skifti.

D.    Svimjari skal hava øll limaviðurskifti við gamla felagið í lagi, áðrenn skifti kann fara fram. Limagjalds- og aðrar eftirstøður eldri enn 12 mánaðir kunnu ikki innkrevjast í hesum sambandi. Eru ivamál um hesi viðurskifti, tekur svimjinevndin avger eftir at hava hoyrt partarnar.

E.    Leggja feløg saman í startfelagsskap, so verður hetta ikke mett sum skifti av svimjifelag. Sama er galdandi tá feløg fara burtur úr startfelagsskapi.

F.    Fyri masterssvimjarar eru ongar avmarkingar viðvíkjandi skiftið av svimjifelag.

Viðtikið á starvsnevndarfundi 30. oktober 2008, broytt á starvsnevndarfundi 7/1-09 og 8. juni 2012.